Dr Stefu het mir letschti es E-Mail mit enere interessante Frag gschickt. Är het emene Dütsche erklärt, das «d Houe putze» i üsere Mundart «abhauen», «weggehen» oder «nach Hause gehen» bedütet. Di glychligi Bedütig het ja ou ds chürzere «i houe's».
Was är de nümme het chönne beantworte, isch d Frag gsi, was de «d Houe» bedütet. «D Houe» (i dr Verchlynerigsform «ds Houeli») isch uf Hochdütsch e «Hacke» oder ou «Harke» (ender Norddütsch).
Dr ganzi Usdruck bedütet auso wörtlech «die Hacke putzen (gehen)». So wyt, so guet.
Zur Härkunft vo däm Usdruck chann i nume rate. I gloube aber, das d Bedütig «weggehen» drum entschtande isch, wil me früecher by dr Wärch (Büez uf em Fäld) als letschts vor em Fyraabe d Wärchzüüg putzt het. De wär doch dr Usdruck «ich gehe die Hacke putzen» glychbedütend mit «ich gehe jetzt nach Hause».
I würdi ned druf wette, aber i meinti, die Dütsche hei sogar e ganz ähnlechi Redewändig mit dr glyche Bedütig: «die Pfanne putzen».
We öpper vo öich meh derzue weiss, chöit dir gärn e Kommentar schrybe.
Keine Kommentare:
Kommentar veröffentlichen