Physik zum aalänge

Bild: Historisches Museum Bern.

Wo ds Pfingschtwucheändi schöns Wätter versproche het, han i gäbigi Triftig gha u bi äntlech d Usstellig übere Albert Einstein im Historische Museum z Bärn ga luege. Dr Grund werum de ds Wätter sötti guet sy, isch dr «Physikpark» im wunderschöne Schlosspark vom Museum.

Physikpark
Im Physikpark chönne Erfindige vo dr Steizyt bis zur induschtrielle Revolution nid nume bestuunet sondern o usprobiert wärde! Me cha Pfylbogeschiesse, usprobiere wi's öppe chönnt gsy sy, Stonehenge z boue, sich imene Loufrad-Lift la ufezie (u denne sälber i ds Loufrad zum dr Lift ufezie), en Obelisk ufrichte, mit ere Dreisyne fahre, imene alte Flugzüg übere Museumspark schwäbe u huuffe meh!
Dr Physikpark isch gwüss henne guet gmacht u es isch e Gwaltsgspass, alli Sache uszprobiere!

bErn = mc²
D Einstein-Usstellig im Museum sälber isch zwar würklech guet gmacht, würkt nach em Physikpark aber e chly troche. Si isch ufteilt i ds Läbe u ds Wärch vom Einstein. Allerdings hets mir für sys Läbe nümme glanget – i ha äuä z'lang im Physikpark umeglaueret :-)

Sys Wärch isch zwar prägt vo so abschtrakte Sache wie dr Relativitätstheorie, Liechtgschwindigkeit, Zytusdehnig oder gchrümmte Ruum – derigs wird aber immer visuell vereifacht u Schritt für Schritt erklärt.
Dihr interessieret öich gar ned für Physik? De gäbs no e Velotour mit Liechtgschwindigkeit dür d Altstadt vo Bärn. Me mues fei trampe, aber derfür geits ab wi ne Moore! Passet uf das dihr nid ab em Göppel gheiet; di ganzi Altstadt chrümmt sich by dere Gschwindigkeit.

No bis im Oktober
D Usstellig isch bis i Oktober verlängeret worde. Lueget das schöns Wätter isch, süsch gheit dr Physikpark i ds Wasser.