Meertrübeli

Dr Dietmar het mi gfraget, wieso die hochdütschi «Johannisbeere» by üs ir Schwyz «Meertrübeli» heisst. I mues säge, da chan i nume rate.

Bild: www.preisvergleich.org.

Dr Usdruck «Trübeli» schynt no eifach z sy. D Meertrübeli gsäih am Struch würklich us wie chlyni Trube.

Ds «Meer» im Name chan i mir nume glych erchläre wie by de Meersöuli. Die Frucht isch vilecht «über ds Meer» zu üs nach Europa bbracht worde. Das würdi zmingscht uf d Härkunft Asie zueträffe.

Das si aber wie gschribe nume Vermuetige. Wenn öpper meh über dä Name «Meertrübeli» weiss, si Kommentär zu däm Bytrag erwünscht!