Poulet-Curry u ds indische Tuech

Ds Ensemble vom Theater Schönau uf dr Büni.

Am letschte Samschtig bin i z Thun ga «Ds indische Tuech» vom Theater Schönau luege. Das isch, einisch meh, e henne gmüetleche Abe gsy – mit emene guete Theaterstück u fantastischem Ässe.

Es isch e gfreuti Sach gsy, dr Krimi vom Edgar Wallace uf Bärndütsch z gseh. Bsunders dr Christoph Stucki het i dr schwirige Rolle vom Edouard (i dr dütsche Verfilmig dr Peter Ross, gspilt vom Klaus Kinski) räschtlos überzügt.

Dank dr Frou Ramesh (d Nachbarin vom Presidänt Daniel Laroche) isch Indie nid nume uf d Büni sondern o uf d Tische cho. Ds Publikum isch mit Rys, Poulet-Curry u Rüebli mit Kokosnuss verwönt worde.

D Russe si z Burgdorf gsi!

Bild: www.russentext.de.

Är isch i dr gröschte Stadt vo Europa ufgwachse, läbt sit 1990 mit synere Familie z Berlin u isch dank syne amüsante Churzgschichte u Kolumne i ganz Europa bekannt worde: dr Wladimir Kaminer.

Am letschte Frytig het dr gmögigi Russ z Burgdorf us syne Wärch vorgläse u Gschichte verzellt. A dr Bar hets sogar Borschtsch für e chlyni Hunger zwüschedüre gä!

Nach dr Läsig isch dr Abe aber no lang ned verby gsi – dr Kaminer het nämlich syni berüchtigti «Russendisko» u sy Kolleg, dr Yuriy, derby gha! Chuum sy d Stüel verörteret gsy, het ds russische Duo Infernale dr Alpinachäller mit russische Rhythme bombardiert. Vo Polka über Ska bis Punk isch alls derby gsi, d Stimmig isch mit jedem Lied besser worde. E richtigi Fuer – как говорил дедушка Ленин? Учиться учиться и учиться танцу. :-)